聖誕快樂﹗﹗

各位好友：

聖誕快樂﹗﹗

又發脾氣啦﹗﹗﹗

有時真係好鬼忟我媽咪﹗明明係自己打麻雀輸錢，又發脾氣，話人地令到佢輸﹗都冇解﹗
好似今日咁，我同姨媽、阿聰同佢打麻雀，打通宵，佢自己牌弱，手風唔好，都冇得冤，成日話人地打得唔好，真係好忟﹗我估佢遲d又會話我輸錢係抵死，因為點…點…點…

好耐冇見

好耐冇寫blog了﹗
真係有好耐啦﹗就嚟忙死啦﹗
好多好多野做﹐多到就嚟好唔曬，無端端又話要搞openday，真係冇果樣整果樣﹗
一月係會多野做到死﹗
二月二日阿tak就結婚，十字綉十份一都冇，真係唔知點算好﹗

何謂戀愛﹗﹗

究竟是蘇民峰厲害，定係佢真係好吸引我呢？我都覺得自己好古怪，突然間覺得自己鐘意咗人﹗仲要我連佢身世係點都唔知﹗只係係這五日四夜中，我睇到佢係一個面惡心慈o既人，愛恨分明，把口好毒，一矢中的，非常冷靜， 人又好man，著起套suit好型，總之，越睇越覺得原來自己鐘意o既類型就係這種～～
你知？我對紀律部隊人員有莫名的好感﹗再睇下睇下，我就被吸引了﹗我自己都覺得奇怪﹗在果一刻，我真係好有衝動問佢攞電話﹗不過我都唔知佢背景，可能佢已經結婚，有兒有女，又可能佢已經有固定o既女朋友﹗我乜都唔知，我都唔知點解自己會對佢有好感﹗我仲傻到上網search佢o既data，究竟這叫唔叫鐘意呢？好可惜只係知道佢o既階級，而唔知佢背景，我唸，一個願意服務咁多年民安隊o既人，本質應該都唔壞掛？
你估？我同佢會唔會有緣呢？
我仲可唔可以同佢見面呢？
究竟緣份係自己製造定係天意呢？
又或者我只係搞清自己鐘意乜類型o既人呢？
古怪～～～

經一事長一智

近日我成日俾你罵，真係俾人罵到怕—
搞個「多元智能挑戰營」令我見到學校o既官僚化o既一面，令我知道乜係見人講人話，更令我知道乜係忍惡揚善—
我只係負責執手尾，但我都唔想，係你地先將d野搞到古古怪怪先﹗同我冇關﹗我默默做咗好多野，但都俾人話﹗話我講錯野﹗但我認為自己冇錯，如果我唔講個問題出來，永遠唔會有人正視這個問題，我只係講事實，但都俾人話﹗我都唔知自己有乜問題？係你地官僚化，係你地手腳慢，同我冇關的﹗我講錯野﹗你都傻﹗如果唔係我咁講，我估我到今日我都唔可以集齊人去camp，到時我地俾人reject，仲醜﹗
所以，我認為自己冇錯﹗我會堅持自我﹗

好久不見﹗

好耐冇寫blog了﹗真係好耐﹗
近來好忙，忙到喘不過氣來﹗每日都在做做做﹗之前又去咗澳門探爸b﹗
爸Bd生意返來了﹗真好﹗雖然係忙d，成日都要兩頭走，但生意不錯，短短幾個月，有成2千萬生意，仲有2年做﹗你話開唔開心呢﹗

走出白蝕的日子-11(漸入佳境)

好開心﹗我d白蝕已under control，一日比一日好轉，而家只係餘下一d白色，已不再係一大塊白色斑，遠睇一d都唔覺，甚至近睇都唔太覺﹗真係好開心﹗
我真係要多謝醫師同黎湛輝醫生，佢地真係好勁﹗
下星期一我要去camp，希望…
情況仍樂觀﹗

開學日﹗

唔經唔覺﹗開學已有2個星期了﹗我唸，我己習慣了返學的日子﹗雖然都幾沉悶，每日都重覆做差不多的事，日日如是﹗
今年我做1b班主任，有d唔習慣，因為1b是一班好班，d小朋友都好乖，同以前1e2e好唔同﹐以前打打殺殺渡日，而家同d小朋友講野係陰聲細氣，大聲d都嚇親佢地﹗真係有d奇怪﹗
而且每日都要看食飯，因為我唔太想佢地落操場玩，唔想佢地同d奇怪人一齊﹗所以每日lunch我都要係課室﹗佢地就好似小朋友咁，吵吵鬧鬧，好嘈﹗
但其實佢地都幾可愛﹗
我有d驚，我漸漸會同2ed學生疏遠，我真係唔係好想﹗

生日快樂﹗hAppY BiRthDay

今日係我生日﹗又大一歲啦﹗哈哈哈﹗今年好貪心，希望可以有多d生日願望：第1希望身體健康，白蝕快d好番，唔洗再做病寶寶﹗第2當然係蜜運成功，唔洗再做孤家寡人﹗第3係爸b生意蒸蒸日上，賺過盆滿砵滿，媽咪開開心心﹗第4係阿弟生生性性，唔好行錯路﹗

尋日我好開心﹗(21/08)因為一大早醫師就同我同阿tak慶祝生日，佢整咗個魚頭煲俾我地，好正，好好味﹗夜晚同華姐佢地食稻香，歐陽百雄個死仔問我點解要自己訂位，我都想知點解？

走出白蝕的日子-10(情況好轉)

好開心呀﹗尋日去見dr lai，佢同我講話我搽藥膏搽得幾好﹗d斑會散開，唔再一點點是好事，同埋d斑開始變淡﹗真係好開心﹗希望繼續keep going，咁就一天都光曬﹗
我開心到都唔記得問dr lai我可唔可以用護膚品﹗哈哈﹗
如果真係咁keep落去，好快我就可以好返啦﹗哈哈﹗

走出白蝕的日子-9(多謝老天爺)

借用陳小春首本名曲個名—多謝老天爺﹗
點解我會咁講，因為今日去廸士尼，其實都好好彩，個天係陰陰地，唔係好猛太陽，對於我嚟講，這可能係一件好事﹗因為我今日雖然唔係好猛太陽，但我已經又戴帽又擔傘，如果真係好猛太陽，可能我會好辛苦﹗
我覺得個天對我都算唔錯，起碼我去玩時，個天對會就我，多謝﹗

自從有咗白蝕後，我先發現原來身邊好多人都有lei個病，顧太同我講，唔好咁緊張，越緊張越唔好，但都好難避免，因為如果唔勤dcheck住自己，我好驚又多一塊我自己唔知，因為我真係覺得越早發覺，越早搽藥係會control到﹗但可能正因為咁，我個病加速得更快，因為我俾咗好大壓力自己，但我自己唔覺，甚至唔知﹗但我都好難去control，因為我自己始終都好care，我成日都會同自己講，我會好番ｏ既，但可能就因為咁我又俾咗好大壓力自己，究竟點先可以做到順其自然呢﹗係咪真係咁難呢﹗
佢地成日話我身體好差，以前我真係唔覺，但而家，我真係覺得自己好弱，好易攰好易出冷汗，係近lei兩個月先知先覺﹗可能係上一年，我真係俾咗好大壓力自己，又或者我overload，結果今年我身體咁差，咁多病﹗其實到而家，我都唔覺自己有壓力，我淨係知道任何事我都可以做到，原來咁樣已經係好有問題，因為我係人唔係神，我冇可能樣樣都可以做到﹗結果天妒英材﹗太叻會有事的—所以下年我要學會放鬆，要多休息﹗養好身體，擊敗白蝕﹗我一定可以做到的﹗加油﹗

廸士尼開心一日遊

早上9:15，出發啦﹗(攝於e34上，準備係青馬收費廣場轉r8到廸士尼﹗)

剛剛到廸士尼，仲係呆吓呆吓？

我地今日駕烈火戰車

小hugo最鍾意o既小木馬

同micky影相，隻hugo驚到伏埋，結果俾d staff笑佢係影帝

瞓醒後，係美國小鎮大街O既小商店入便﹗

阿妹、小HUGO同佢地最鍾意O既donald duck。結果阿妹買咗聰明鼠、小hugo買咗史廸仔﹗

好開心﹗今日我同媽咪、芬姨、嫦姨、霞姐、信、可兒、志浩、阿妹和hugo仔一齊去廸士尼，真係好開心﹗阿妹玩得好奮鬥，對於佢來說，每一樣都係新奇刺激，樣樣都好新鮮，最搞笑係我捉咗佢去玩space mountain，真係嚇死佢，嚇到佢唔咁張開眼，我自己都驚佢嚇親，好彩之後又冇事﹗

hugo仔真係好活潑，捉都捉佢唔住，最可愛係最後同佢買公仔，佢一見到隻史廸仔就開心到飛起，真係超可愛﹗

原本話我請佢地去的(因為我有payback)，但芬姨話佢又俾一半，結果我同佢一人一半，總知就好開心，family day﹗

雖然有少少落雨，但都係好事，因為冇咁熱，同埋對我來講，陰天係好過晴天的﹗對嗎？

其中美中不足是我地睇唔到lionking個musical，如果睇埋就真係所有野都可以玩晒﹗(當然係指值得玩果d啦)不過最緊要係d小朋友玩得開心﹗

雖然之前好擔心帶埋小hugo會好辛苦，但其實又唔算，再上我地推車仔，有小hugo駕車仔，真係舒服好多，起碼所有重嘢都唔駛自己攞﹗正﹗

吐氣揚眉

哈哈哈…今日真係好開心﹗我d學生成績非常好﹗差唔多個個都係4/5等﹗總算對得住天地良心﹗
其實今朝返學校，見到佢地一隻二隻成績一般，我都好擔心，都有唸過我係咪唔得﹗雖然有一兩個頂住，但都係唔係咁滿意﹗
點知下晏返到阿sir度，就有連番喜訊，先係子英由上年F變成5等，之後又有美伶的5等，仲有大孖o既5等，細孖o既4等﹗哇，真係勁開心，請佢地食餐勁都扺，真係超開心﹗
阿SIR話，我今云總算吐氣揚眉啦﹗

伴嫁心情

近期，差不多日日都陪阿tak處理有關佢結婚o既事宜，見到佢結婚，自己有d孤單的感覺，有一dd羡慕，但我又覺得果種感覺又唔可以統稱為羡慕，只係好想自己都有人陪，唔知幾時先到自己啦﹗有d驚自己一世都唔會有，又有d驚自己會好似試妝果日個女人咁，到四十幾歲先著婚紗，又驚自己……總知心情夾雜著百般滋味﹗在替阿tak感到開心同時又會唸，明明自己同佢同年，點解佢咁好彩可以咁早搵到一個可以同佢一生一世o既人，而自己仍然孤家寡人，尋尋覓覓？仲有一點不捨，因為知道佢結婚後，可能唔會再好似以前咁自己，因為佢有自己o既家，總知果種感覺我真係唔識形容﹗奇怪之餘仍為她覺到開心喜悅﹗因為佢搵度啦﹗

放榜

聽日係中五放榜o既日子，唔知今年佢地o既成績會點呢？
希望佢地最低限度都做到一級狀元，唔好不被評分，如果唔係我真係會好失望﹗因為我覺得5c有d係得o既！有返一定水平，希望佢地會得到一個好成績﹗

走出白蝕的日子-8可怕的習慣

原來習慣真係好恐怖的事﹗
不知不覺，知道自己患出白蝕已有兩個多月，漸漸地已習慣要撐傘的日子，我發現而家自己唔開傘是唔會行係陽光下，就算可能只係兩三步都好，都係會先開傘﹗仲有我己習慣每朝早要先搽藥膏，要早半個鐘到一個鐘起身，先刷牙同洗面，然後搽藥；每晚沖完涼後，要先搽藥膏，然後綉花又好，上網又好，寫日記或睇書，要等半個鐘同食藥先好瞓……
這一切，只係短短兩個月，已好習慣，係恐怖定悲哀？

走出白蝕的日子-7

我今日照鏡﹗又再發現自己多咗幾撻白斑﹗又多咗啦﹗真係有d想死o既feeling ，做乜突然多咁多，究竟同乜有關﹗是否因為我食咗凍嘢？定係因為我多咗去醫師度？定係我近來多咗出街，而天氣又熱咗？定係因為我就來姨媽o黎？非常費解？

一個新的開始

今日我又開多一個新blog啦﹗不過這是用來買賣的blog，我決定將紋身同飾物放上網買，希望可以殺出一條血路﹗雖然情況唔樂觀﹗

走出白蝕的日子-6

病情，可能冇想像心咁樂觀﹗我今日見Dr Lai，佢同我講情況仍樂觀，因為頭髮冇變白，仍然算係under control，面仍是有得救的﹗但手就唔好咁大期望啦﹗
聽完後，我都feel good的，因為都ok﹗不過我沖涼時發見我腳面上又多咗一塊白斑，我可以好肯定尋日是冇的，因為我尋日先油完腳甲，如果有，我一定見到，是剛剛出的﹗好驚﹗我今日食過豆腐雪糕，唔知同食涷嘢有冇關係呢？
不過為自己著想，我唸我以後都係唔好再食任何涷嘢同涼嘢啦﹗因為如果我唔控制，可能以後都返唔到轉頭﹗
我記得我曾經係以前的日記上講過，我願意用一切來換爸爸和媽媽的生意，等媽咪同爸b唔再煩惱，我記得的，所以有白蝕，我唔怨，我只係希望我o既病可以控制，唔好惡化﹗我會努力做好自己，努力保重身體，未來o既路仲有好長，我一定可以捱落去的﹗
如果可以，我真係希望我o既病可以控制﹗
自問自己都係一個好人，希望真係好心有好報﹗
因為…
未來o既路真係好長，
我好驚…
有朝一日
我頂唔到o既時間
我唔知會點…

HARRY POTTER 萬歲

等咗好耐，終於等到啦﹗《HARRY POTTER AND THE DEATHLY HALLOWS》終於出版啦﹗要好努力睇先得﹗

原本今日係要返太平攞貨，點知D貨唔齊，好彩返去前打個電話，如果唔係，真係慘情﹗

阿德個衰妹又亂買嘢啦，再咁落去，真係好擔心佢﹗

走出白蝕的日子-5_原來我可以" v "

原來我真係可以捱到的﹗

原來我真係仲可以係陽光下活動的﹗

原來我仲可以去camp的﹗雖然可能係最後一次自己可以玩，要完全服從o既camp﹗

但係過去果2日，我做到啦﹗

講真，個camp真係好值得去，雖然我o既戰利品係隻手多咗幾撻白斑，但我覺得係值得o既：

我從未試過march步操，我係一個連左右都搞唔清o既人，仲要係烈日當空下晒咗，但原來只要堅持，係可以，雖然有時未必做得咁完美，但原來我都可以的﹗

我從未試過扎竹，原來，只要肯做，又可以扎個木架出黎摘水彈﹗

仲有，我仲可以去行山，只要做足防晒措施，我仲可以做outdoor活動的﹗雖然我個look係「割草阿嬸」，但只要放開心境，唔mind，都幾得意，仲可以娛樂大家添﹗

但係我係冇唸過咁活學活用，尋日先教我哋用救傷用o既「船床」，今日行山時就用到，仲要係一個約170磅o既人，班男同學真係好勁，好辛苦，原來應該用約2小時行o既路程，我哋行咗約45分鐘就要停，仲要在山頂上等咗約30分鐘，班猛男先將張「船床」攞到上山頂，之後我地班女仔跟madam用咗約30分鐘行返轉頭，相中條褲就係我o既戰績﹗因為條路真係好斜﹗但班男仔用咗2個小時先可以落翻黎，真係辛苦晒﹗

不過最搞笑o既係阿sir，佢竟然可以因為話call直昇機咁冇面而決定唔call，真係好搞笑，不過我知道班阿sir真係好勁，因為佢地話主要係班阿sir去用力救人﹗我對佢地心全敬意，佢地係專業係professional﹗

係個camp入面，我都遇到好多古靈精怪o既人，例如商中PE黃sir、同師弟子豪、以前一齊係陳震夏實習o既黃sir仲有超搞笑o既倪sir，我真係笑到對住佢嘖水，對唔住﹗哈哈﹗

最感動o既係當其他人知道我有病時，都好關心我，我真係好多謝大家﹗

去camp前囉囉孿

結果搞咗一大輪，最後都係要去camp，仲要係一大朝早入營果種，你話係咪搞笑呢﹗
我知道人地已經讓咗一大步俾我，俾我唔駛烈日當空下暴晒，其實我真係有唸過唔去，因為我好辛苦咁搽咗3個星期藥膏，先有一d好轉，如果前功盡廢，你話點算呢？
我真係好驚，希望可以捱到啦﹗如果捱唔到，又點呢？

冇所事事又一天

最近迷上咗打bomberman，日又打，夜又打，打到天昏地暗，原來定下咗話今個summer要綉起阿tak幅十字綉，但到而家到係得果小小，我唸我真係要加油﹗

我今日又見嘉慧，可能我心地已平伏，已沒有怨念了，我只希望佢活得開心，雖然我對佢o既生活仍有所保留，但那又如何，this is her life，none my business﹗

要加油﹗明天要返工﹗

2e之死

好唔開心，真係晴天霹靂，我下年唔會係3e班班主任，我真係好唔開心﹗
我上年好努力好努力咁去mood我自己班2e，目的係要佢地原班升上3e，我成日話一個也不能少﹗但今日開會，真係晴天霹靂，先係話我自己一個去3f﹐只係俾曾果、吳寧業、李俊和、狗狗仲有個唔記得俾我，其他的跟黃sir去3e，之後加入一d非常勁o既猛人俾我，好似小峰峰、大口狗lai d人，仲要係我自己一個人做班主任，我會死嫁﹗當時我第一個反應係我唔做，最多我搵過第二份工，大不了賠一個月糧﹗我要極力爭取原班升(包括班主任)，但可惜冇人理我﹗
之後6點幾，李sir同陳sir打俾我，我落form1做1b班主任，同我講， 叫我顧全大局﹗我真係唔想，我好想睇住班3e升上form4，我放咗咁多心機落去，到頭來得個桔，我真係好唔想﹗
幸好o既係，我發現原來你交個心出來對人，係有回報o既，在lai一件事上，黃sir撐我撐得好勁，甚至幫我打電話俾鄧sir，我真係好多謝佢﹗
同佢part都幾好，起碼我地有默契，唔洗估估吓，但我真係好唔想離佢地而去﹗
我成日同佢地講，做人要有口齒，但到頭來，要佢地失望了﹗
2e，我真係好唔捨得你地﹗

走出白蝕的日子-4>︿<

原來只要鬆懈一d，我d白斑就會出現﹗
我今日又發現自己d白斑多了，是因為這幾天我開始鬆懈，不再好似前幾日咁著緊，但一鬆懈，白蝕又出現了﹗在心口，忘記搽防晒o既地方﹗
今日去camp前的information day，發現原來果幾日是要在烈日當空中暴晒，有擔心，應唔應該去呢﹗去，身上o既白蝕好大機會會增加，但我係唔係就咁逃避一世呢﹗永遠都唔可以見光呢？
其實，今日我又發現白蝕o既心情，已俾之前鎮定，冇再發癲，這究竟是好事定壞事呢？
其實我真係好驚﹗如果再多落去會點呢？係唔係我真係可以安全過渡呢？
我真係唔知點﹗
我記得家寶同我講過，要樂觀面對，因為好多人關心同支持我﹗
我都知，不過，我只係想講句，好難捱﹗好辛苦﹗
心理壓力好大﹗我好想大叫﹗
我只係想講，之前我心口d斑，並唔係我發雞盲睇錯，係真o既﹗
希望搽藥膏可以控制到﹗

2e紿於有你

諗返起，原來又一年了﹗
在過去一年，2e係發生咗好多事：
先有狗狗成日發脾氣兼發癲，成日要call家長來接佢走，到後來佢同楊sir作對，俾人out出課室，仲有到下學期尾開始生性，真係俾佢玩咗一年﹗
果隻澤，連出成績表都要帶麻煩俾我，等咗個幾鐘先可以出到一張正式的成績表。一年中，最記得o既，一定係學期初發我脾氣，挑釁我o既事﹗
仲有子龍，成日賴皮—
靜靜可以算是2e的奇葩，自成一格﹗出汙泥而不污，但都幾惡，會反抗﹗？
安宜是最失望o既一個，成個八婆仔咁
濼權令我人生第一次到醫院入邊軟棉棉的房﹗
杰杰令我知道原來佢癲起上來，真係六親不認
俊和有好大o既進步
倩怡係令我最討厭o既一個，佢完全唔知道尊重為何物﹗你叫我繼續照顧落去，真係冇可能﹗
家駒和柱良簡直脫胎換骨，如果柱良可以改一改把口，咁就更好
可惜孝德今年唔生性，經常玩過火，結果發生好多不愉快事件
阿果開始由一隻獨自躲在角落療傷的野獸變成肯與人溝通
阿海同寧業就自成一角，不理世事，可惜成日玩過龍
阿彤今年惡咗好多，開始識罵人保護自己
盈盈仍然都係咁細粒，怕怕羞羞咁，不過開始識打人
大雞由最初惡形惡相到而家識得規矩
淦良、蔚倫同志榮都係咁，成日都渾渾岳岳，只係顧住打機
俊傑有時會發白日夢
振宇仲係成日唔返學
2E雖然你地有好多不是，帶俾我好多麻煩(真係好多)但你地係我o既驕傲
因為有你﹐2E變得精彩
因為有你﹐2E變得不平凡
我真係好希望下一年仍然能繼續做你地班主任，因為睇住你地一日一日咁進步，真係好開心﹗
你地要記住，你地係我O既驕傲﹗
你地帶俾我好多歡樂，好多寶貴O既回憶
明年要繼續生生性性
一年比一年進步
明年~
我期待…

在晴朗的天空下

今日係散學禮度，聽到一首好有意思o既歌《在晴朗的天空下》，歌詞真的好有意思：

張開眼中 一扇暖暖的窗

驅走這赤地裡的荒涼

從大地頭上, 初升的朝陽

照出一個永遠方向

懂得愛心, 知道怎麼分享

不枉愛過活過這一埸

誰亦是同樣, 奔波於驕場 人潮從來沒有築牆

**人和人 年和月都太類似 無論怎麼都只活一次

晴朗的天空中找到生息的真意 人才能無悔舊時

在人潮和圍牆下只要願意 憑著一雙手總是可以

晴朗的天空中跨過彼此的疆界 連潮流亦會轉移**

一早決心, 將我愛笑的心

感染世上愛哭的人

曾立下宏願, 可不可都能

唱出真正壯闊聲音 關心眼光,

仿似最美的燈 終於會照亮遠方的人

如未盡全力, 怎麼可消沉

能抬頭, 凡事也可能

真的好想可以做到歌詞入邊所講的「能抬頭, 凡事也可能 」

如果真係可以咁堅定，我一定會努力走落去﹗

沒有貢獻的一天

今日是全日休息日，什麼都冇過，唯一可以話有貢獻的事就係重拾成年都冇掂過的粘土，整o左一堆碟﹗
今日同媽咪一齊去惠康時，佢問咗我一d有關我個病o既嘢，當時我真係唔係好想答，係因為我真係唔想提﹗佢俾我個感覺就係個答案唔啱心水就唔好接受，但係咁唔得﹗我都想我個病唔係白蝕，但醫生證實咗係，我都冇辦法，我知道佢關心我，但唔等於要逃避，事實就係事實﹗

寶妮加油呀﹗

le幾日都好忙，好唔得閒，因為polly唔開心，我去咗陪佢﹗
有時見到佢咁，我都好心痛﹗點解一個咁charming o既女仔，會為咗一個男人搞成咁，原來愛人真係可以好盲目﹗但不斷咁拖拖拉拉落去，又可以點呢？
尋日佢同我講，唔拍拖都好嫁﹗我聽完後，有驚訝﹗我從冇諗過，polly會講d咁灰 o既說話﹗
情原來真係可以傷人傷得好深﹗
咁我係咪應該慶幸自己冇拍拖呢？

心情雜記

我今日走出買了部新的nds，好抵$1290，比我想像中抵﹗不過我按唔倒全部掣一齊出返主目錄﹗明天返鋪頭齊齊﹗
諗返係lunch食飯時，我突然間好感慨，原來今日同我一齊食飯o既人，下年全都會各散東西，難得今年找到幾個熟do既人，點知佢地又走啦﹗真係有d感慨，不過天下無不散之筵席，keep in touch囉﹗

30/06同日加演

同日加演HUGO的眼淚，話說小HUGO唔肯飲奶，俾芬姨捉住要佢飲奶奶，結果就梨樹帶雨，俾我地影晒相，最精警O既一張就係佢滴眼淚反光，結果就出現了以上O既戲劇效果了﹗哈哈﹗

美麗的潼潼

星期六同hugo和細細妹(小豆妹)慶祝生日，啱啱同一日又係潼潼o既畢業典禮，潼潼要表演，化個靚妝，著到好sexy，真係好靚嫁﹗

走出白蝕的日子-3^.^

希望在明天？
可能lai一句說話係真嫁﹗
搽咗幾日藥膏後，隻手d斑好似真係淡色咗﹗
希望再搽落去，越來越淡色就好啦﹗
今日係知道自己有白蝕後第一次真係日光日白咁出街(有好猛太陽的日子)
原來要搽防晒同擔傘都唔係咁難受啫﹗@3@
雖然係就係麻煩咗d，但又唔係真係出唔到街，只係真係要等一等，等我擔好把傘先行，不過其他人都會原諒我同等埋我﹗冇辦法啦，鬼叫自己有病咩﹗
等我一陣間去馬拉松買佢果把防uv傘先，去街前要做足準備ma﹗

西部通道試行記﹗

非常厲害﹗
今日我同爸B媽咪一齊試行西部通道﹗超快﹗由洪水橋搭的士到聯檢大樓都係$88，共用咗13分鐘﹗好快﹗
最搞笑係媽咪一早就叫醒人話要去西部通道，點知佢去到先知自己唔記得帶回鄉卡，結果要返轉頭攞，但正因為佢要返轉頭，我地先可以JOIN埋PAMELA、偉哥同HUGO仔一齊去﹗
但爸B就要等我地成個鐘了﹗^~^

走出白蝕的日子-2

我好想大叫﹗我好想喊﹗我唔知我仲可以承受幾多，我好似每一次照鏡我都發現自己身上多咗d白斑，我明明心口都無比太陽晒過，點解都會有白斑？
我好驚﹗如果再咁落去會點？
我真係好驚自己到時會全身都係斑﹗
好驚﹗點解會咁﹗
係咪自己做錯嘢﹗
點解要發生係我身上﹗
我不斷咁同自己講，我要積極面對﹗我要樂觀面對﹗
我一定會好﹗醫生話係好小事﹗但好似唔係咁﹗
我發現都唔係咁﹗
我未知係白蝕前都冇咁嚴重﹗
但知道後，就好似一日比一日嚴重﹗
我明明只係搽咗2日，但好似仲不斷增加咁﹗
係咪我以後都唔可以晒太陽？
明明以前我真係好鍾意太陽的﹗
以前係晒極都唔黑的﹗
但而家，我竟然要180度改變，
我都接受，
但我真係唔可以再接受我d白蝕再多落去﹗
我會想死的﹗

被欺壓的一天

勁唔開心﹗凌速欺騙我﹗明明同我講話有位，而家又話冇~~真過份
我之前已經同佢講話我想訂位，但又話唔可以，搞到我五月book時，又話已經full晒﹗黑人憎﹗
近期都唔知做mung，樣樣都唔合我意﹗
我要book檔位冇檔位
無神神又話我有白蝕
都唔知想點﹗

一起走過的日子

估下這是誰的手？

攝於23/06/07，小妹家(摸鼻哥大輸家^.^)

個heading好似好老土，但覺得是最貼切的﹗
今日睇返d相，唸返起以往的日子，原來佢地已經長大了﹗
仲記得第一次見佢地時，佢地仲似懞下懞下咁，俾我串到一楝都冇…
但今時今日，佢地已經畢業啦﹗大個啦﹗

下次見到佢地時，唔知又會點呢？

走出白蝕的日子-1

有時，我會唸，與其不開心，不如積極面對﹗
可惜…
知易行難﹗
一時三刻，仍未能接受﹗
重未唸過，原來我都要日搽夜搽防曬…
重未唸過，原來我都要擔遮出街…
重未唸過，原來我都要喜歡下雨的日子…
重未唸過，原來我都要…
好煩﹗
但
我又可以點樣…

小青蛙

我知道﹗只有你會陪住我﹗陪我走過的我喜與悲﹗我今日真係好失落﹗我醫過兩個醫生，佢地都係話我係汗斑﹗但點知，今次個勁人expert話係白蝕﹗雖然佢話不用擔心，係有得醫，我知道要搞好耐，同埋其實並不容易痊癒的﹗

所以，係le一刻，我真係好失落，好唔開心﹗

有時我會忍唔住唸﹗是否我o既問題呢？

點解今年我會咁多病痛，人人都話我壓力大，但我真係一d感覺都冇﹗我淨係知道，係時間而家我要做le d嘢，所有嘢已有人一早幫我安排好﹗我根本唔駛用腦，唔駛擔心……

係咪正因為咁，所以我成搞到今日咁地步﹗

你話我係咪好hurt﹗

其實我又唔係，我已經接受咗，只係仲有少少……

我都唔識形容，總知…

就係一d唔好受o既feeling……

不開心的一天

6月26日 不開心的一天

今日，當醫生話比我聽我患咗白蝕時，我真係好唔開心，點解又係我﹗
上次已經係喉嚨，今次仲要係好難醫O既白蝕，我真係好想大叫﹗點解要咁對我，我自問都冇做傷天害理O既事﹗成日都係咁﹗
過份﹗