小b出世了﹗

陳小b終於遲咗9日出世，果隻陳小b6磅幾，折磨咗佢阿媽十幾個鐘後，終於肯出來同我哋班契媽見面，佢嘅大牌程度，拍得住佢阿媽﹗佢咁姍姍來遲，所以一於叫佢做陳姍姍﹗
不過見到陳小b精精靈靈咁，都原諒佢啦﹗
好可惜，由於陳
希望陳小b平平安安，健健康康咁長大啦﹗

陳小b
生日快樂﹗

p.s.幾經辛苦之下，我終於係窮到燶嘅情況下，考到車牌了﹗

走出白蝕的日子-18(原來我也可以平靜面對!!)

我真係冇諗過﹐原來我也可以咁平靜面對﹗

自從睇咗師姐後，我真係覺得自己有改變，我到而家仍然相信我自己係會好得番，特別係師姐講得出我個病徵後，我對佢真係超有信心。

好可惜…
事實真係咁嗎？

我都唔知點解，近期我對手、腳背，後頸出越來越嚴重，我覺得係因為類固純啲藥力過晒了，所以情況又再惡化，但我覺得我真係唔可以一世依賴佢，所以我的起心肝去醫，完完全全信師姐一次。

我記得以前每當我知道自己又多一撻時，我會發癲，但我今次冇，係因為我習慣咗，定係我相信我自己係一定會好番，這只是過渡？

有時我會諗，其實我係咪真係身在福中不知福，我個病只係好少事，我又唔會有生命危險，只係會越來越白，但個心理壓力真係好大。

有時我會諗，如果我再咁落去，我會唔會一世都孤獨一人？我真係好唔想一世都得自己一個，但如果我一世都要用類固純，我結婚其實只係會拖累別人，同時世上又有幾個人係唔會介意同一個一世都唔可以生活在陽光下的人一齊？

知足？
我真係唔知足嗎？
我只係想試一下戀愛嘅滋味，點解個天會唔記得我？
我真係作咗好多孽咩？自問我待人都唔差，但點解我個遭遇會咁，點解要我一世都唔可以生活係陽光下，我真係好想再試一下去海灘游水嘅感覺，好想再次係陽光下踏單車，呢d生活，可能…
我一世都唔會再試到﹗
我真係好想試下…

我真係可以試到嗎？
我真係可以好番嗎？

我今次可以咁平靜面對自己再次病情惡化的事實，究竟係好事定係計時炸彈未爆，我真好怕…

我都好怕有一日，我自己控制唔到自己會失控…
我都唔知自己應該點？

都仲係好失落﹗

好失落，好唔開心，都唔明點解會咁，明明係冇問題，個彎係咪真係咁難轉，明明我已冒住生命危險同埋被曬白的危險去，但都要我唔得，我真係覺得好唔低，我隻手真係白咗好多嫁﹗好失望﹗好失落﹗好想喊﹗都唔係我錯﹗冇理由係我錯﹗﹗

死得不明不白…

好唔開心，原因係死得不明不白，從來冇唸過肥佬嘅原因係轉彎太差，我真係好想知何謂好差？明明我冇出界又冇行到隔離線，咁都叫差，我唸我一世都唔會合格啦﹗
明明係自己心情唔好，就話我錯，我真係冇錯嘛﹗
師傅都話我冇問題，實ok，如果我真係轉彎轉到去隔離線，咁就係我錯明但我真係冇咁做到嘛，咁都叫轉得好差，咁乜野叫好，我時速又冇過20，又係慢慢轉，咁找究竟做錯乜喎？
上次話我冇望鏡，咁我都算，但今次話我轉得好差，我就唔服﹗
我真係唔係做錯，我明明好係平日師傅同我操咁﹗如果咁都叫差，師傅一早同我講，叫我改啦﹗
過份﹗不知所謂，俾借口就係俾借口﹗
我憎死你呀﹗

生日禮物

小鈺所送的gift

tak所送嘅水樽
爸爸媽媽同kitty姐姐張生所送大利是

華姐、sandy 、阿龍送嘅銀包

華姐、sandy 、阿龍送嘅散子包

tak送嘅大禮物

好開心—

謝謝大家送嘅禮物，特別係傻婆，無端端買咁大份禮俾我…

萬分感謝﹗

我會禮尚往來的

哈哈哈…

又再一次HAppY bIRtHdaY tO mE

哈哈哈…

HAppY bIRtHdaY tO mE

又大一歲啦﹗

今日好開心，同屋企人一齊去食法國菜慶祝我生日，真係好開心，可能食物唔係真係最貴，但爸B和阿弟特登返來同我食飯…

仲要係爸B一d都唔好嘅法國菜，佢都肯陪我食…

你話係咪一份好好嘅生日禮物呢﹗

仲有尋日，華姐、sandy、peter pan、小杜、杜嫂、歐陽同我食生日飯，

姐妹們仲送咗生日禮物俾我添，真係好開心呢﹗

而我自己亦已買咗生日禮物俾阿tak，

真係好開心﹗

我今年嘅生日願望同去年差不多

1：希望我的「他」快d出現，唔駛次次都係幫人整花球，希望可以快d整俾自己；希望唔駛只係祝福人，快d俾人祝福

2：希望爸b生意興隆，自己生意也興隆，快d還完所有loan。

3：自己身體健康，白蝕快d好番﹗

yeah—

痛…

近期都好心不在焉，唔係好願出街及瞓覺，因為總係瞓得唔係咁好﹗
心口成日都好似有野咁，想發洩，但事實上又好似冇野，感覺好怪…

午夜夢迴，好想有人在身邊，
究竟我而家果種感覺，係咪叫孤獨呢？

想有人陪…
想理所當然咁同人分享自己的喜與悲…
想有需要時，有人慰藉…

寂寞令人痛…

心情？

近來身體好似又差咗了﹗因為我滿地都係頭髮，究竟點解又會再次差番呢？
是因為工作壓力大，應該唔會…中五都走晒啦？已經冇關係啦﹗
自己成績？玩野啦﹗仲有成10日先交功課，但已經做得7788…
舖頭？阿杰已經做緊野啦﹗我只係負責俾錢？
果隻臭鴨？走開啦﹗睬佢都傻，成日自把自為﹗
選舉同俾人數？可能掛？但都與我無關，隊我咪隊我囉，反正都唔恨做，最好唔駛我做…又唔會炒我
可能咁多樣加埋，我d壓力又嚟了﹗要保持心情放鬆，唔好俾壓力自己，亦唔好唸咁多，要放開懷抱﹗

今日收到一個好勁的醫生data，話佢醫白蝕好得，仲要係過來人介紹的，我決定短時間去look look，希望係好消息…
不過就嚟放假啦﹗心情放鬆，對我個病都好d﹗

加油，小燕，一定會好番的﹗﹗﹗

珍姐

今日同ningsze及阿tak去睇相，同樣又再一次唔記得自己個時晨，真係玩野﹗
真係等咗好耐，成粒鐘，明明book咗都要等咁耐…
都ok準，細個時d野就一般，但大個都ok﹗
佢話我如果想可以做到好高級﹗(哈，我當時立即話唔好掛，咁辛苦…)
佢話我都有財運，有專業線，又有理財線，雖唔係大富大貴命，但都係好命水…
我聽完都覺得ok啦，反正我都唔係要大富大貴，我只係要開開心心，生活無憂就可以了﹗
佢仲話我現在身邊有桃花，叫我feel下，但我真係唔係好覺咗，莫非係巴士阿叔？唔好掛，等我今晚好立即擺陣…旺下桃花先…

唯一失望係…
佢話我個病唔關相事，佢都冇辦法，順其自然…

我當時都有唸…
如果惡化落去會點呢？
但我立即同自己講…
我一定會好番的…

況且佢話我會結婚，命格仲會有一仔一女，
我相信，
我個病一定會好轉的…
如果唔係，我點結婚…

仲有最好笑係…
我唔係肥命的人
佢要我減肥，珍姐話…
瘦番後，我會仲好，
好既然係咁，再冇理由同自己話唔減肥了﹗
加油…
小燕
明天會更好
要持之以恆，你一定會成功的…
你一定會好番的…

走出白蝕的日子-17(情況未如理想)

有d灰心﹗解點會無端端多咗撻﹗
明明尋日照鏡都冇的，點解今日就多咗撻﹗仲要係鼻翼兩側﹗兩邊咀角又慢慢開始出﹗夏天來到，身體又開始變差了﹗
我唸我又要開始過番d清淡嘅生活，唔好再飲凍野了﹗係一d都唔可以﹗
凍野都唔可以再食了﹗
同樣，我相信我一定會好番的﹗

其實心情都好複雜，你話係咪有d失望啦﹗當然有啦﹗因為我都以為自己已慢慢好轉時，情況又再反反覆覆…
但係咪又再想崩潰時，又好似唔係，心入邊又好似已經預咗咁，只係有一點兒失落…
有d想怨個天，點解要咁對我﹗
但我仍然相信…
我一定會好番的…

我想去睇睇第二個醫生…
有blogger留言話黃醫師好，不如真係去睇睇
可能真係有幫助呢？
又或者，返廣州俾阿杰個爸爸睇睇，又可能真係得呢？

更甚者，姑姐曾經講過我隻腳好差，不如真係試下做多d腳底按摩，可能又會好d呢﹗
真係買部osim返嚟日日做，對自己好d，醫番好自己﹗

我深信，我一定會好番﹗

月經就到，所以又差d，遲d鼻兩側就會退了…

走出白蝕的日子-16(謝謝﹗希望有用!!)

從來冇唸過，原來自己個blog係有人會睇﹗
原本只係唸住只係用來發洩一下自己嘅情緒同患病嘅心情，估唔到會遇到咁多「同道中人」大家可以交流心得﹗

可能我算係較幸福的一人，就算有病，情況都唔算太嚴重，我記得我自己都曾經因為睇見自己一日比一日差而哭過不停，亦都試過發忟，但我發覺，如果自己再咁走進死胡同，情緒只會越來越差，到時唔單只自己身體有病，自己心靈亦會生病，情況只會更加差，所以我同自己講，我一定要堅強，一定要保持心境開朗，唔好俾壓力自己，要知道，我哋會病嘅其中一個原因係壓力太大，所以要保持放鬆﹗

我剛有病時，都曾試過不斷上網睇下有冇資料啱用，但好多時都令人失望﹗我希望我過往嘅經驗能幫到大家：以下係我近來對付「白蝕」的心得：

我係中西醫一齊睇的：]

• 西醫我睇黎湛暉，每次收費約550-700不等，要睇下你要乜野藥膏，第一次一定係$700左右，因為要攞晒咁多種藥膏，只係搽就得，冇藥食的﹗之後差不多1個到2個月才復診一次，用晒d藥先需要搵佢﹗
• (我而家係只攞藥膏，每次約$100，大約個半月攞一次)
• 中醫我就去黃大仙鳯凰新邨同德堂張君寶醫師度睇，，診金$80，再加藥$80-100不等，但唔係每次都要睇佢，可以睇完後拿佢張藥單自己去其他藥材店都得﹗又或者睇完第一次後，之後淨係叫佢幫你煲藥，咁都係只收藥費$80﹗醫師超好人﹗
• 一定要有充分休息，因為如果唔係，就會復發…
• 一定唔可以曬…出街一定要搽防曬同帶傘，唔可以懶(而家咁曬，有時我會帶口罩添)
• 唔可以食生冷野同涼野，要戒口：好似凍飲啦、雪糕、白菜、小棠菜、白菜仔、黃芽白、花箕蔘、清補涼、綠荳、海蔕、雪梨、竹蔗茅根…這類咁涼嘅食物，全部都唔可以食﹗尤其係雪糕，我之前一食就會出…
• 因為係中醫個角度，身體虛弱先會出白蝕，我係因為脾虛所以做血功能出現問題，所以有白蝕。所以一定要戒口

我好得咁快，其中一個原因係我戒口都戒得幾清，涼野我一定唔食，至於凍野，免得過都唔食、唔飲﹗我只係會好間中先飲一杯凍飲，就算係雪櫃攞出黎嘅野，都等一等，可能兩三分鐘後先食，等陣雪氣過咗先﹗

所以一定要有定力﹗

近來我手背同腳背又再出番，我知係因為我又返工又返學，所以壓力好大而引起的，同時又因為自己懶，成日都唔同自己腳背搽藥，所以有惡化嘅跡象，要加油，唔好再偷懶﹗

一定會好番的﹗

如果大家有問題或者又心得，歡迎各位互相交流﹗
希望大家共同努力，我哋一定會好番嫁﹗

船到橋到自然直？

真係好想這句說話係真嫁﹗船到橋頭真係會直的﹗
阿杰打俾我，問有冇興趣再揼多間舖，一句講晒，真係好有興趣，不過錢係一個問題，要成10萬，而家我真係冇可能變十萬出來，莫非真係又要再借，而家戶口有7萬，原本打算用來還loan的，我真係要先還loan，再問銀行借錢，借8萬？分18個月還，可行嗎？
老實講，我真係覺得work的，因為國內啲人越來越有錢，亦越來越捨得洗錢，如果我而家唔行先，食住條水，我覺得真係好浪費，難得有此機會，賭一舖大細啫﹗反正錢我一定可以賺得返﹗咪當儲錢囉﹗以後要洗少d錢﹗
除咗問銀行借之外，我還有什麼辦法呢？
船到橋頭會唔會直呢？

變得越來越醜!!!!

睇返自己d相，原來自己變得越來越醜﹗真係好醜樣，個樣殘到自己見到都驚，雙眼無神且塊臉越來越圓，好醜樣﹗
咁落去唔掂當，容乜易一世嫁唔出，要快d執執佢，做多d mask，令自己容光煥發d，同時真係要keep fit，唔可以再係玩玩下，真係要做多d運動，減返廿磅﹗加油﹗我唔想再次俾自己嚇親，真係醜樣到Y﹗

草蜢+門徒

我嘅草蜢熱潮，好像仍然心有餘悸，心仍未能放下，有d似遇初戀情人再次見面的感覺，心有餘悸，未能抽身…
有時我都忍唔住問自己，似咪真係咁愛？
我都唔知點答好？可能真係咁愛掛？
唔知將來再次睇番自己今日的所作所為，會否得啖笑呢？
又或者…
可能會有意想不到的結果出現呢？

今日睇咗門徒，真係一套好戲﹗

各個演員都非常出色，好戲

個故事又好有思考空間

人在長久已習慣的空間，會否變得冷漠？

當自己迷茫時，又有冇人幫你一把呢？

當以為自己已逃離某個世界時，會唔會其實只在原地踏步呢？

停不了的草蜢﹗+ 媽媽送的一份禮物

近日，仍然係停不了的草蜢，我都唔知自己幾時先可以停下來，唔再是我的全部﹗我又發咗瘋咁去追蹤他們：have a nice day、home sweet home、去雲飯局，停不了﹗但好似已俾放假時好咗，起碼唔會再係日日都係咁﹗
追蹤草蜢，係想多d了解他們，但越了解就越被他們吸引，簡真係不能自拔，當中我深信有d係真的，所以正因為佢哋嘅真，更吸引我，我都好希望有一班咁嘅朋友，雖然我嘅朋友都係好到冇得彈﹗但仍好想更了解佢哋多d。
唸起都覺得搞笑，自己細個時從來唔會追明星，反而人大咗，學生走去追星﹗仲要係瘋狂果種，都幾搞笑﹗
其實有時我都會唸，係咪自己把對愛情的幻想放咗去佢哋度呢﹗就好似睇小說咁，好想個ending係永遠幸福快樂﹗草蜢就好似一部未完的小說咁，我好想不斷地追落去，直到我搵到個ending為止。但其實佢哋係活生生的人，又點會好似小說咁，話要有ending就end到俾你睇呢？所以話，人真係古怪喇﹗況且我都唔想佢哋有ending住，我唔想佢哋拆夥，更加唔想佢哋有事…
所以我只能話這是「未完成的小說」…

近期亦多咗好多幻想，一d好sweet的幻想，如果真係有時間，可能我都可以出番本言情小說，反正我文筆都ok，可能又會係另一個世界呢？

正因為近期有好多幻想，所以我好想擁有這份「甜蜜」，唔知會唔會成功呢？可惜連對象都冇=,=

媽咪今日送咗條玉鍊係我，好開心﹗因為係媽咪送俾我的，唔係因為佢個價，而係因為係媽咪送的﹗

仍舊是草蜢

到現在，心情已開始慢慢平伏下來﹗
可能是自我控制吧﹗雖然仍想保持著那份亢奮的心，但…
不可能的﹗要收拾心情了…
睇番自己寫的事，可能連我自己都覺得有點傻，好像自己愛上咗一個唔會屬於自己的男人一樣﹗
但我今日真係有戀愛的感覺，雖然我自己都唔知點解？
雖然我好清楚自己係在幻想，但對住他們，我真係瘋狂，我傻到去買番佢哋05同06concert來睇，仲要睇到好感動，亦好後悔點解當時唔去睇﹗仍好期待「忘我」出dvd，好想再重溫當時果種亢奮的氣氛，總之，我愛上了草蜢﹗
我好希望孤寂嘅眼神唔好再係阿傑嘅眼裡出現，亦好希望佢快d搵到佢係真命天子，不論係男定女，我都希望佢能幸福快樂﹗
阿細同阿智家庭生活美滿，囡囡們生活愉快，健康快樂﹗
我愛草蜢，希望你們能一切順利﹗

草蜢~~欲罷不能

睇完草蜢演唱會已十日有多，但仍有欲罷不能的感覺，佢哋嘅舞台魅力，真係不容忽視﹗

佢哋係會令我不由自主地想了解佢哋多d﹐越了解就越愛佢哋，到而家…真係變成咗佢哋嘅超級fan，或許以前我只會愛阿細，因為阿細真係一個好男人，顧家愛老婆同女，佢真係好鍚佢個女yumi同ian，特別係yumi，佢真係花好多時間去照顧同陪佢，因為咁我好愛你，亦都好羡慕劉小慧，有一個咁多嘅男人做佢老公。
但自從了解佢哋多咗後，我對阿智同阿傑都有好大嘅改觀。
阿智原來都係好男人一名，仲要係痴心果隻，我相信佢都係一個好爸爸，佢都好錫佢個女，同時原來佢好有才華，真係唸唔到，佢係一個憂鬱嘅人﹗
阿傑係一個追求完美嘅人，佢嘅心靈係封閉的，佢係一個孤芳自賞嘅人，佢係一個寂寞的人，Lonely真係好啱佢，特別係歌詞：
獨個感 Lonely 萬人共歡 亦獨嚐 Lonely
我唸佢或許時常會有呢個感覺吧﹗
尤其是有時係做訪問中，不經意地見到佢所流露嘅寂寞神色，真係好吸引﹗
吸引我嘅原因係同我自己好似，或許我唔似你咁追求完美，但我有時都會覺得自己係冇人明白我﹗或許這是因為我哋都唔願意打開心屝讓人了解自己，亦可能係因為我哋覺得只要自己明白自己就可以，但事實上，我哋仍會感到寂寞﹗特別係當身邊嘅人係一雙一對時，我唸，或許你所流露嘅神色對我好吸引嘅原因係我哋係同類人。
我羡慕你的原因係你有兩個好兄弟陪你走過大半生，雖然我覺得你哋已有點距離，但你仍然知道係有人陪你同支持你的，但我唸你或許仍會有點失落，因為已唔可以返番以前，以前你哋係三位一體，但現在已各有各的家，特別係佢哋兩人都有一個幸福嘅家庭，但你好似仍原封不動，但其實你所追求嘅又唔係這些，你真係原封不動嗎？又唔係，你又好似搵到自己嘅理想，你係世界出名嘅dj remus，你又有出唱片，好似你其實都比佢哋行得更遠，但你仍感到寂寞，你要不斷挑戰自己，但當你走到某一高峰時，又好似略有所失？是否因為冇人能和你分享，又好似唔係，我身邊朋友一大堆，知心好友更是不少，但好以要講到心靈上嘅貼合，又好似…欠缺了少許…
所以常有孤單嘅感覺…
係咪咁呢？

這一切使我不知不覺愛上咗佢哋，特別係阿傑，佢哋係舞台上嘅魅力，係感動人心的﹗我仍然係最愛阿細，但佢開始吸引著我，讓我想了解佢哋三個更多，這就是佢哋嘅魔力﹗

非常期待下年25週年嘅演唱會﹗我一定會買飛 入塲再一次感受草蜢嘅魅力﹗

草蜢-阿細--我愛你

今晚我同car car去咗睇草蜢演唱會﹗超好睇﹗
100滿分，我俾足100分﹗
舞又勁﹗歌又好聽﹗快歌又得、慢歌又好聽﹗
又跳又唱高音仍然上到﹗勁﹗
今時今日樂壇新人，真係要學吓﹗超勁﹗
阿細真係好型—
佢係黑色喱士超得﹗
仲有佢身型超正，係有8嚿腹肌﹗
真羡慕劉小慧﹗
總之﹐
草蜢係超正﹗

陰錯陽差？

近日發生了一連串的陰錯陽差﹗
1.本星期的心情都好差，原本已決定唔上的堂，咁啱在不解的情況下，收咗我， 結果，
堂…
出乎意外都有趣且好玩﹗
心情都變得好些…
2.原本我寫咗一封信俾媽咪，同佢講我嘅感受， 結果…
佢冇睇到，
反而我因原際會，同佢親口講，
結果…
俾想像中好…
3.到今日，在戲劇堂上，排咗一封有關雪糕車的戲「雪糕人生」，感觸良多…
結果…
晚上聽到雪糕車嘅音樂， 忍不住立即出門尋找音樂的來源…
最後，看見雪糕車在我面前轉彎，駛入惠康附近 立即跑上前， 正在遲疑食蓮花杯好定軟雪糕好時，
老闆同我講 冇晒筒 不如要蓮花杯，最多我在蓮花杯上加軟雪糕俾你﹗
當時，不由得從心情笑出來… 好呀﹗

你話…
世事係咪好奇妙呢？

失望!!!心寒!!!!

我今日聽到媽咪同我講：佢話叫舅父仔唔好「傾」茶俾佢，佢係唔會飲的，如果硬來，佢會唔俾面大家﹗
我聽到後，好失望﹗真係好失望﹗﹗
如果佢咁做，我唸我哋以後會冇親戚做的﹗同時佢有冇唸過心姐會點？佢會勁尷尬﹗如果我係佢，我唸我都會好唔開心﹗
整件事錯不在佢，但佢就要受咁嘅委屈﹗
我真係唔知我媽咪係度唸乜？原來人真係可以做到咁絶，我真係好心寒﹗我真係好驚﹗我好怕有一日佢哋都會咁對我﹗
我真係覺得原來真係只有自己會對自己好﹗世上所有一切都係唔可信的﹗人話反面就反面，半點都不留情面﹗
佢仲係咪口硬心軟？
自從佢講左一番咁嘅說話後，我都唔再夠膽講了﹗
原來人係可以話變就變﹗
快樂嘅時光一去不復返了﹗
以後：
應該唔會再有bbq…
唔會再有大食會…
唔會再有整角仔…
更加唔會再有去佢哋屋企食飯了…
唔會再有同遊廸士尼了…
一切已成追憶了﹗

講真，
我真係唔係好想同佢哋一齊食飯，我係有心避佢哋的，因為每一次我看見佢兩公婆，我都有心痛同心寒嘅感覺﹗心真係好痛，我好驚有朝一日，佢都會咁絶情對我﹗
如果佢地真係咁對我，我驚我會承受不了﹗
我真係好驚﹗
因為我已經見到她們無情不顧親情的一面﹗

我真係好驚有朝一日會出現在我身上…


世上所有人都係信唔過的……
所有人都有可能會對自己無情……

好唔開心﹗

真係好唔開心﹗
明明一件喜事點解會搞成咁？
有時我d眼淚真係好想從眼眶裡流出來？係唔係真係咁大件事，我總是覺得有人想小事化大，想耀武揚威﹗好醜﹗真係好醜﹗
明明大家都係一家人，點解要搞成咁﹗究竟係邊個做成的？真係是因為代溝，少溝通？定係根本係自作孽？會唔會係有人講d唔講d，搞到佢咁醜？
我都唔知？我真係唔想知﹗我只係想一家人開開心心﹗
點解佢地從來都只係從自己的角度出發﹐覺得佢做的事係人都知？我唔知就係我的錯？但佢又知我幾多野呢？
永遠都係咁﹗只係從自己的角度出發？
點解要阿弟都唔可以同佢地溝通？真係以後冇親戚做？
人地做錯野真係冇得原諒？做人真係要咁絕？
我相信山水有相逢，做到咁絕，等陣只係自己再受傷一次﹗
如果佢真係可以做到咁絕，咁有朝一日，會唔會都會咁對我？
再一次對自己人感到失望﹗
如果再來一次，我會唔會頂唔住？

~小氣~~

我從來冇唸過，佢係咁小氣﹗
明明大家都想息事寧人，但係都要搞都咁大件事﹗
都唔知佢都點， 成人都發脾氣，只係唸自己，話人地唔尊重佢，咁佢又有冇尊重過人呢？話拆就拆，明知都唔係自己，係都要整，整完就當係自己，我都唔明佢地嘅唸法，成日都依著自己係大，以為自己一定啱晒，唔講理—
係~係佢啱晒，一定係人地錯
冇解都唔知佢想點—冇解
我唔理啦﹗總之，我唔會再同佢傾

失望

今日係自上星期日吵架後，第一次和他們見面，好失望﹗
失望在於各人的反應﹗
雖然各人都好努力，但仍然回不了以前﹗
我想有一段時間亦唔會好似以前咁開開心心食飯﹗
媽咪仍是好生氣﹗
但大家都唔知點面對，因為大家都覺得自己冇錯﹗
我真係覺得大家都冇錯，只係大家觀點與角度吧﹗
但當中最令我失望的係爸b嘅反應及說話
我冇唸過原來佢係咁偏激的，
我從來都冇覺得自己係要求人，我只係覺得佢哋自小都好錫我，所以我會對佢哋好，但我唔明點解佢會咁，係因為佢本身都係咁小器定係佢係他們身上受咗好多氣，而這些是否媽咪做成的呢？
因為媽咪成日要爸b認低威，終於佢唔忍了，終於佢遷怒各人了﹗
我都唔知﹗
我今日先發覺，我以前曾經以為我好了解各人，
但原來我係最無知的一人。
我唔想再做面面俱圓的人了
好辛苦!!!!!
我唔想再理會各人的感受了﹗
我只係想知，其實
有冇人係會關心我呢？
我越來越感到寂寞了﹗
這個寂寞係來自原來曾經以為的好幸福破滅了
對各人的失望
唔知…
仲可唔可以返回以前呢？

心情仍是很差﹗﹗

心情好差，做事提不起勁﹗整個人都好冇心機﹗
腦裡邊仍不斷地迴繞昨天的情景，一句句傷人的說話，仍不斷在腦海中迴響，心好痛﹗

我好努力同自己講，要放低，要看開d
但我都係人，
只係短短的一日，我唸我仍有本事放開，
我都尚且咁唔開心，我更加唔可以想像媽咪有幾唔開心﹗
我都唔知可以同佢講乜好？

我不斷係度唸，究竟真係媽咪做人失敗定係大家都「身在福中不知福」，
究竟點先可以息懷？

事件再發展落去，又會係點呢？
會大家都當冇事發生，定係只會越變越差？

我真係唔想知會變成點？
我只係知道：

心受傷了，是好難復原的

~心痛~

我終於明白心痛係乜野感覺﹗
我亦都明白乜野係眾叛親離的感覺﹗
我從未冇唸過一d咁傷我心的說話係出自的最錫嘅人…
我今日終於明白我媽咪唔開心d乜﹗
原來真係會「好心做壞事」，你做左嘅野，人地唔一定會appericate
可能你以為為人地做嘅好事，人地會認為你多事，縱使可能同佢冇關﹗
今日我終於能理解，世界上點解會有咁多人「各家自掃門前雪，休管他人瓦上霜」，原來喱一句係至理名言來的﹗縱使果個他人係自己親人，原來道理都係一樣「多一事不如少一事」。
今日，我為我媽咪感到心痛，原來我真係唔明佢。係舅父仔間屋嘅事上，我一直都唔明佢唔開心d乜，我都以為佢一直係怪冇左d地，我唸我今日聽完各位阿姨嘅說話，我開始明白原來佢唔開心，從來都唔係為左d地，而係為左佢嘅親兄弟姊妹都佢嘅不信任，對佢人格嘅懷疑。我心信以我媽咪嘅性格，你話要晒所有野，佢都會俾你，係因為佢真係好錫你地，但原來最終係換來咁嘅對待，我為我媽咪感到心痛，我唸佢地係冇唸過佢地嘅說話對媽咪係有幾大嘅傷害﹗最終原來佢地都係唔明白……從來係冇人會關心媽咪嘅感受﹗
第二件事我感到心痛嘅係嫦姨嘅一番話，我「獲益良多」，原來人係可以自私到咁，係從來唔會理會人地嘅一番苦心，我亦通過佢嘅一番話，明白原來佢係對我地有咁多不滿，縱使媽咪嘅出發點係為佢好，原來佢從來都唔領情。對此我上了一堂重要嘅課，原我我地一家係別人嘅眼中，係一班貪得無厭嘅狼﹗原來為佢地做咁多野，最終都係冇人領情，都係「聲名浪藉」，都係「有自唔在，攞苦黎辛」。
經過今日，我學會自己顧自己，做人係唔應該多事﹗
我唔知道係咪我自己唸埋一邊，定係自己多疑。
但我知道自此，我要學懂唔好多事，縱使你嘅出發點係好，原來可能人地都唔會領情。
只有咁樣，我先唔會受到傷害…
只有咁樣，可能先可以「姊妹情深」……
只有咁樣，先唔會再有心痛嘅感覺……

好準!!!!!

今日冇意中都咗一個網址玩算命，結果都幾得意：
內在想法
*個性倔強，且自我意識非常強烈
*自信心強、個性不服輸，是個獨立自主的女孩子
*以自我為中心，不容易採信別人的想法或建議
*想法前衛有新意，喜歡追隨流行
*疑心病比較重，嫁人後喜歡碎碎唸

外在行為
*不按牌裡出牌，經常令人跌破眼鏡
*相當調皮、可愛，常常是團體中的開心果
*相當具有同情心，是個性情中人
*比較愛享受，非常善待自己
*疑心病有點重，對於親蜜的人更是懷疑東懷疑西

好似都幾準—
尤其是外在行為方便﹗

仲有話我今年有桃花，仲要係有90%，好大機會找到合適對象—
希望係真的﹗

這是否一個好的開始呢？

2009年的第一次

原來已經係2月了，
原來已經好耐冇寫blog了﹗
講真的，近來心情真係痲痲﹗成日有好孤單的感覺﹗
個人好down
我個mr right係邊呢？
我是否真的要孤單下去呢？
看著身邊的人一個一個結婚﹗
心想：
幾時到我呢？
月老是否忘記了我？
我好記得春爺一首歌的歌詞大約的意思係：
命運之神ㄚ高抬貴手 不要忘了我 拜托
對，千萬唔好忘了我
我都好想有人陪﹗
你會幫我嗎？