流年不利？

今年䆒竟發生乜野事，點解咁多唔順利野？
先係好姐妹發癲，搞咗幾個月，要生要死咁手，之後另一個姐妹要離婚，俾人蝦，跟住一波未停一波又起，媽咪無端端有癌症，搞咗我一大輪，又話唔做化療，又話咁又話咁，成人發脾氣，爸爸又好唔高興，因為媽咪成日無理取鬧，成日搵我呻，都未搞掂，又話細佬唔生性，佢想交低啲生意俾細佬，但細佬又懶懶閒咁，今日仲話唔想接，老實講，佢唔接，邊個接，我都明，真係未必可以賺倒錢，但‧‧‧佢唔接，又可以做啲乜呢？我知道媽咪對佢係有啲唔公平，成日以為咁做係為佢好，但佢真係好慘，成日俾人hold起啲錢，攞唔返。媽咪爸爸又真係唔識理財，結果我啲做咗成幾十年生意，都係啱啱好，冇錢淨，月光族。
為咗以上嘅野，我已經好鬼煩嘅時候，好朋友又為轉工嘅事而心大心細，又要日日陪佢諗，陪佢傾偈，又碰啱剛開學，又係學生會選舉，十萬樣都未搞掂，仲要煩埋媽咪，因為佢想唔打針，仲要佢因為擔心呢樣擔心果樣而成日忟薑咁，好辛苦！我而家最擔心係明天佢又突然發癲話唔打針，而家講到佢肯打化療針，只係唔想打果四支加強劑，話個反應好辛苦，老實講，我真係好想佢打埋，但我明白冇得迫，所以我真係好希望明天醫生話可以唔打，咁就一天光晒，搞少好多野。否則‧‧‧真係死俾你睇😔
仲有陳氏一家嘅家庭問題，又吵架又話離婚。唉
今日，我仲要收到曉偲屋企嘅不幸消息，仲有婷婷...唉！真係好想近來所有嘅不快掃走呢！
還好，阿卓個衰仔轉到工，今日簽埋約，唔駛再搞多幾日，終於有樣野係順利。希望呢個係一個好嘅開始。。。